‘‘มยฺหมฺปิ สุกตํ กมฺมํ, โยหํ อทกฺขิ นายกํ;
วินิปาตา ปมุตฺโตมฺหิ, ปตฺโตมฺหิ อจลํ ปทํฯ
[24]
‘‘ยํ ยํ โยนุปปชฺชามิ, เทวตฺตํ อถ มานุสํ;
ทิวสญฺเจว รตฺติญฺจ [สมนฺตา สตฺตรตนา (สี. ปี. ก.)], อาโลโก โหติ เม สทาฯ
[25]
‘‘ตาเยว มณิปูชาย, อนุโภตฺวาน สมฺปทา;
ญาณาโลโก มยา ทิฏฺโฐ, ปตฺโตมฺหิ อจลํ ปทํฯ
[26]
‘‘สตสหสฺสิโต กปฺเป, ยํ มณิํ อภิปูชยิํ;
ทุคฺคติํ นาภิชานามิ, มณิปูชายิทํ ผลํฯ
[27]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[28]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[29]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา มณิปูชโก เถโร อิมา คาถาโย
อภาสิตฺถาติฯ
มณิปูชกตฺเถรสฺสาปทานํ ทุติยํฯ
3. อุกฺกาสติกตฺเถรอปทานํ
[30]
‘‘โกสิโก นาม ภควา, จิตฺตกูเฏ วสี ตทา;
ฌายี ฌานรโต พุทฺโธ, วิเวกาภิรโต มุนิฯ
[31]
‘‘อชฺโฌคาเหตฺวา [อชฺโฌคเหตฺวา (สี. สฺยา. ปี.)] หิมวนฺตํ, นารีคณปุรกฺขโต;
อทฺทสํ โกสิกํ พุทฺธํ, ปุณฺณมาเยว จนฺทิมํฯ
[32]
‘‘อุกฺกาสเต คเหตฺวาน, ปริวาเรสหํ ตทา;
สตฺตรตฺตินฺทิวํ ฐตฺวา [พุทฺโธ (สฺยา. ก.)], อฏฺฐเมน อคจฺฉหํฯ
[33]
‘‘วุฏฺฐิตํ โกสิกํ พุทฺธํ, สยมฺภุํ อปราชิตํ;
ปสนฺนจิตฺโต วนฺทิตฺวา, เอกํ ภิกฺขํ อทาสหํฯ
[34]
‘‘เตน กมฺเมน ทฺวิปทินฺท, โลกเชฏฺฐ นราสภ;
อุปฺปชฺชิํ ตุสิเต กาเย, เอกภิกฺขายิทํ ผลํฯ
[35]
‘‘ทิวสญฺเจว รตฺติญฺจ, อาโลโก โหติ เม สทา;
สมนฺตา โยชนสตํ, โอภาเสน ผรามหํฯ
[36]
‘‘ปญฺจปญฺญาสกปฺปมฺหิ, จกฺกวตฺตี อโหสหํ;
จาตุรนฺโต วิชิตาวี, ชมฺพุมณฺฑสฺส [ชมฺพุสณฺฑสฺส (ปี.)] อิสฺสโรฯ
[37]
‘‘ตทา เม นครํ อาสิ, อิทฺธํ ผีตํ สุนิมฺมิตํ;
ติํสโยชนมายามํ, วิตฺถาเรน จ วีสติฯ
[38]
‘‘โสภณํ นาม นครํ, วิสฺสกมฺเมน มาปิตํ;
ทสสทฺทาวิวิตฺตํ ตํ, สมฺมตาฬสมาหิตํฯ
[39]
‘‘น ตมฺหิ นคเร อตฺถิ, วลฺลิกฏฺฐญฺจ มตฺติกา;
สพฺพโสณฺณมยํเยว, โชตเต นิจฺจกาลิกํฯ
[40]
‘‘จตุปาการปริกฺขิตฺตํ, ตโย อาสุํ มณิมยา;
เวมชฺเฌ ตาลปนฺตี จ, วิสฺสกมฺเมน มาปิตาฯ
[41]
‘‘ทสสหสฺสโปกฺขรญฺโญ, ปทุมุปฺปลฉาทิตา;
ปุณฺฑรีเกหิ [ปุณฺฑรีกาทิ (สฺยา.)] สญฺฉนฺนา, นานาคนฺธสมีริตาฯ
[42]
‘‘จตุนฺนวุติโต กปฺเป, ยํ อุกฺกํ ธารยิํ อหํ;
ทุคฺคติํ นาภิชานามิ, อุกฺกธารสฺสิทํ ผลํฯ
[43]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[44]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[45]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อุกฺกาสติโก เถโร อิมา คาถาโย
อภาสิตฺถาติฯ
อุกฺกาสติกตฺเถรสฺสาปทานํ ตติยํฯ
4. สุมนพีชนิยตฺเถรอปทานํ
[46]
‘‘วิปสฺสิโน ภควโต, โพธิยา ปาทปุตฺตเม;
สุมโน พีชนิํ คยฺห, อพีชิํ โพธิมุตฺตมํฯ
[47]